Қазақстанның аграрлық экспорты 35 пайызға өсті

Редакция
20 қараша 2026, 15:02 12
Қазақстанның аграрлық экспорты 35 пайызға өсті Сурет авторы: kaztag.kz

Қазақстанның өңделген ауыл шаруашылығы өнімдерінің экспорты биылғы тоғыз айдың қорытындысы бойынша 3,4 миллиард долларға дейін өсті. Бұл туралы Ауыл шаруашылығы министрлігінің баспасөз қызметі хабарлады.

Ведомство басшысы Айдарбек Сапаровтың айтуынша, 2026 жылдың қаңтар–қыркүйек айларында өңделген агроөнімдер экспорты өткен жылдың сәйкес кезеңімен салыстырғанда 1 миллиард долларға жуық ұлғайған (былтыр 2,5 миллиард доллар болған). Осылайша өсім қарқыны 35 пайызды құрап, жалпы аграрлық экспорттағы өңделген өнімнің үлесі 51,3 пайыздан 53,3 пайызға жетті.

«Бұл - Мемлекет басшысының алдымызға қойып отырған басты міндеттерінің бірі. Қазақстан тек шикізат ретінде астық сатудан ғана емес, дайын өнім өндіруден де табыс табуы тиіс. Бұл - ауыл шаруашылығының экономикалық қайтарымын мүлде жаңа деңгейге көтеретін қадам. Елімізде бұған қажетті қуатты шикізат базасы бар. Біз жыл сайын 18–20 миллион тонна бидай және 1–1,2 миллион тонна жүгері өндіреміз. Ал биылғы жүгері түсімі 1,7 миллион тоннаны құрады», - деді министр.

Министрлік деректеріне сүйенсек, қазіргі таңда елімізде жылына 5 миллион тоннадан астам астық өңделеді, оның ішінде 510 мың тоннаға жуығы терең өңдеу әдісімен іске асырылады.

Соңғы көрсеткіштер мен болашақ жобалар мынадай:

  • 2025 жылы елімізде 145,1 мың тонна крахмал өнімдері өндіріліп, көрсеткіш 21,8 пайызға артқан;

  • Биоэтанол өндірісі 21 мың тоннаға жетіп, алдыңғы жылмен салыстырғанда 2,2 есеге өскен;

  • 2029 жылға дейін жылына жалпы қуаттылығы 5,8 миллион тонна шикізатты құрайтын, бидай мен жүгеріні терең өңдейтін алты ірі кәсіпорынды іске қосу жоспарланып отыр.

Айта кетейік, осы бағыттағы «Қазкрахмал» және Fufeng кәсіпорындары қазірдің өзінде алғашқы өнімдерін шығара бастады.