25 миллион долларлық жемқорлық дауы: Моңғолия президенті қызметінен кетті

Редакция
19 қараша 2026, 16:36 3
25 миллион долларлық жемқорлық дауы: Моңғолия президенті қызметінен кетті Сурет авторы: Ақорда

Бүгін, 19 қарашада Моңғолия парламенті ел президенті Ухнаагийн Хурэлсухтың өз еркімен қызметінен кету туралы өтінішін қабылдады. МОНЦАМЭ мемлекеттік агенттігінің хабарлауынша, Ұлы мемлекеттік хуралдың отырысына қатысқан 104 депутаттың 96-сы бұл шешімді бірауыздан қолдаған.

Дауыс беру аяқталған сәттен бастап Мемлекет басшысының өкілеттігі ресми түрде тоқтатылды.

Жаңа президент ант қабылдап, қызметіне кіріскенге дейін Мемлекет басшысының міндетін парламент төрағасы Сандагийн Бямбацогт уақытша атқарады.

Моңғолия Конституциясына сәйкес, парламент алдағы төрт айдың ішінде кезектен тыс президент сайлауын өткізуі тиіс. Ал нақты дауыс беру күні президенттің өкілеттігі тоқтатылғаннан кейін 20 жұмыс күні ішінде жарияланады.

Ухнаагийн Хурэлсух 17 қараша күні өзіне тағылған жемқорлық айыптауларынан кейін қызметінен кететінін мәлімдеген болатын. Даудың басы Ұлан-Батырдың бұрынғы мэрі Хишгээгийн Ньямбаатардың атышулы мәлімдемесінен басталды. Ол президентті «Тавантолгой – Гашуунсухайт» теміржолының құрылысына байланысты 25 миллион доллар көлемінде пара алды деп айыптады. Бұрынғы әкімнің сөзінше, 2019 жылы үкіметті басқарып тұрған кезінде Хурэлсух Bodi International компаниясына ірі келісімшартты ешқандай байқаусыз алып берген.

Алайда Ухнаагийн Хурэлсух тағылған айыптарды үзілді-кесілді жоққа шығарып, тергеуге барынша көмектесуге дайын екенін жеткізді.

«Мен ешқашан өз халқымнан да, мемлекеттен де ештеңе ұрлаған емеспін», – деді ол.

Өз кезегінде Bodi International компаниясы да бұл ақпаратты жала деп атап, шенеуніктерге қолма-қол ақшалай пара бермегенін мәлімдеді.

Саяси сарапшылардың пайымдауынша, бұл оқиға билеуші Моңғолия халықтық партиясының ішіндегі өзара тартыс аясында орын алып отыр. Соған қарамастан, бұрынғы президенттің партия ішіндегі ықпалы әлі де сақталған.

Еске сала кетейік, Ухнаагийн Хурэлсух 2021 жылдың маусымында қызметіне кіріскен еді. Ол Конституцияға енгізілген өзгерістерден кейін алты жылдық мерзімге сайланған Моңғолияның алғашқы президенті болды.