Қазақстан «Заң мен тәртіп» конституциялық қағидаты тұрақты, болжамды және ашық орта қалыптастырудың берік негізіне айналуы үшін барлық жағдайды жасайды. Бұл туралы Мемлекет басшысы Қасым-Жомарт Тоқаев Стратегиялық әріптестердің III форумында мәлімдеді.
Президенттің атап өтуінше, республикада жүзеге асырылып жатқан ауқымды саяси және әлеуметтік-экономикалық өзгерістер осы қағидаттың құндылықтарына негізделген.
«Біздің Конституциямыз заң үстемдігін және барлық азаматтардың заң алдындағы теңдігін бекітеді. Жемқорлар тобына ешқандай кешіріммен қарауға болмайды, өйткені бұл мемлекеттің болашағы үшін өте ауыр зардаптарға әкеп соғады. Сыбайлас жемқорлық халықтың мемлекетке деген сеніміне селкеу түсіреді, елдің сапалы дамуына кедергі келтіреді және жүргізіліп жатқан реформалардың нәтижесін жоққа шығарады. Сондықтан менің ұстанымым өзгермейді: кінәлі деп танылғандардың ешқайсысы заңда көзделген жауапкершіліктен құтыла алмайды және құтылмауы тиіс», – деді Мемлекет басшысы.
Сонымен қатар Қасым-Жомарт Тоқаев заңның баршаға ортақ екенін және бұл бұлжымас қағида саналатынын ерекше атап өтті.