Ақмола облысында жүк пойызы ер адамды қағып, көз жұмды

Редакция
20 қараша 2026, 11:46 5
Ақмола облысында жүк пойызы ер адамды қағып, көз жұмды Сурет авторы: wikipedia

Қайғылы оқиға 19 қараша күні күндіз Шортанды ауданына қарасты Шортанды мен Дамса ауылдарының арасындағы теміржол учаскесінде болды.

nayza_kokshe парақшасының мәліметінше, машинист теміржол бойында отырған ер адамды пойыздан шамамен 300 метр қашықтықта байқап, шұғыл тежеу қолданған. Алайда соқтығысудың алдын алу мүмкін болмаған. Ер адам оқиға орнында көз жұмды.

Алдын ала мәлімет бойынша, марқұм Шортанды ауылының тұрғыны болған. Оның теміржол бойында не себепті отырғаны әзірге белгісіз.

Астана станциясындағы Көліктегі полиция басқармасы теміржол көлігі қозғалысы немесе оны пайдалану қауіпсіздігі қағидаларын бұзу салдарынан абайсызда адам өліміне әкеп соққан дерек бойынша қылмыстық іс қозғады.

Қазіргі уақытта оқиғаның барлық мән-жайын анықтау үшін тергеу амалдары жүргізіліп жатыр.

 

Баман Ислам