АҚШ-ты дүрліктірген цифрлық дағдарыстан кейін Ақ үйде алғашқы ірі кадрлық шешім қабылданды

Редакция
20 қараша 2026, 12:46 3
АҚШ-ты дүрліктірген цифрлық дағдарыстан кейін Ақ үйде алғашқы ірі кадрлық шешім қабылданды Сурет авторы: depositphotos.com

Ақ үйде АҚШ президенті Дональд Трампқа киберқауіпсіздік мәселелері бойынша кеңес беріп келген Шон Кэрнкросс қызметінен босатылды. Дереккөздердің мәліметінше, бұл шешімді Дональд Трамптың өзі қолдаған. Қараша айында авиация саласында, ірі банктер мен Microsoft сервистерінде орын алған жаппай техникалық ақаулардан кейін бұл Трамп әкімшілігіндегі алғашқы ірі кадрлық ауыс-түйіс болып отыр.

АҚШ-тың киберқауіпсіздік жөніндегі ұлттық директорының міндетін уақытша Кирстен Дэвис атқаратын болды. Ол қазіргі уақытта Пентагонда ақпараттық технологиялар саласына жауап береді. Ал қызметінен кеткен Шон Кэрнкросс бұл лауазымды 2025 жылдың тамызынан бері атқарып, федералды ведомстволардың киберқауіптерден қорғану жұмыстарын үйлестірген еді.

13 қарашада америкалық диспетчерлік орталықтарда байланыс ақауы туындап, АҚШ-тың Федералды азаматтық авиация басқармасы елдің барлық әуежайларында ұшақтардың көкке көтерілуіне уақытша тыйым салған болатын. Шектеу шамамен төрт сағаттан кейін ғана алынды. Салдарынан 18 мыңнан астам әуе рейсінің кестесі бұзылды.

Дәл сол күндері АҚШ-тың ірі банктерінің клиенттері жеке кабинетке кіре алмай, есепшоттағы қалдықты тексеру және ақша аудару кезінде қиындықтарға тап болды. Сонымен қатар Zelle төлем сервисінің жұмысында да іркілістер тіркелді.

Ал Microsoft компаниясындағы ақау электрондық пошта мен өзге де жұмыс сервистеріне әсер етіп, бүкіл әлем бойынша жүздеген миллион қолданушының жұмысын тежеді. АҚШ-тың Ішкі қауіпсіздік министрі Маркуэйн Маллин Конгреске берген есебінде тергеушілердің қарашадағы осы оқиғалар арасында тікелей байланыс барын әзірге анықтамағанын жеткізді.