Жалақы сақталады, демалыс көбейеді: Бразилия жұмыс аптасын қысқартып, қоғамдық көлікті тегін етпек

Редакция
20 қараша 2026, 11:39 5
Жалақы сақталады, демалыс көбейеді: Бразилия жұмыс аптасын қысқартып, қоғамдық көлікті тегін етпек Сурет авторы: depositphotos.com

Бразилияда 16 желтоқсаннан бастап алты күндік жұмыс аптасынан бес күндікке көшу кезең-кезеңімен басталады. Тиісті жарлыққа ел президенті Луис Инасиу Лула да Силва 19 қарашада қол қойды. Жаңа реформа аясында қызметкерлердің жалақысы сақталып қана қоймай, демалыс және мереке күндері қоғамдық көлікте жүру тегін болмақ.

Жаңа тәртіпке сәйкес, 16 желтоқсаннан бастап апталық ең жоғары жұмыс уақыты 44 сағаттан 42 сағатқа дейін, ал 2027 жылдың 16 желтоқсанынан бастап 40 сағатқа дейін төмендетіледі. Ақылы екі демалыс күніне құқық бірінші кезеңнің өзінде-ақ беріледі. Конституциялық түзетуге сай, демалыс күндерінің бірі мүмкіндігінше жексенбіге сәйкес келуі тиіс.

Үкімет деректері бойынша, қазір елде 14,8 миллион адам алты күндік кестемен еңбек етеді. Бұдан бөлек, жұмыс уақытының қысқаруы қазірдің өзінде екі күн демалатын, бірақ аптасына 44 сағат жұмыс істейтін тағы 21,7 миллион қызметкерді қамтиды.

Ауруханалар мен күзет қызметтерінде бұрынғыша «12 сағат жұмыс, 36 сағат демалыс» кестесімен істеуге рұқсат етіледі. Егер бір айдағы орташа жұмыс аптасы белгіленген шектен асып кетсе, артық жұмыс уақыты қосымша демалыспен өтеледі немесе үстемеақы ретінде төленеді. Өтемақы тәртібі ұжымдық келісімшарттар арқылы айқындалады.

Кейбір жағдайларда ұжымдық келісім бойынша екінші демалыс күнін сол айдың басқа күніне ауыстыруға болады. Дегенмен қызметкерге әр апта сайын кемінде бір демалыс күні, ал айына орта есеппен аптасына екі демалыс берілуі шарт.

Бразилия Конгресі Конституцияға енгізілген түзетуді 16 қазанда жариялаған болатын. Алты күндік жұмыс аптасын жоюды кәсіподақтар мен Рик Азеведу негізін қалаған «Жұмыстан тыс өмір» қозғалысы белсенді түрде қолдады. Жарлыққа қол қою рәсімінде мемлекет басшысы технологиялардың дамуы еңбек өнімділігін арттырып, жұмыс аптасын қысқартуға мүмкіндік беріп отырғанын атап өтті.

«12 сағаттық ауысымнан және автобуста өткен тағы төрт сағаттан кейін жұмысшының өз баласының басынан сипауға да уақыты қалмайды. Біз еңбекті барынша адамгершілікке сай еткіміз келеді», — деді президент.

Сонымен қатар Луис Инасиу Лула да Силва демалыс және мереке күндері қоғамдық көлікте жүруді тегін етуге уәде берді. Үкімет тиісті түзету жобасын Конгреске қазан айында енгізіп қойған.