Астанада Азиядағы тұңғыш ірі вокалдық мегажоба — Silk Way Star жартылай финалын қорытындылады. Маусымдағы ең тартысты шығарылым саналған 9-эпизодта қазылар алқасы финалға өткен жеті қатысушыны жариялады.
Финалға шыққандар:
-
ALEM (Қазақстан)
-
Язмин Азиз (Малайзия)
-
Автандил Абесламидзе (Грузия)
-
Мишель Джозеф (Моңғолия)
-
Чжан Хэ Сюань (Қытай)
-
Саро Геворгян (Армения)
-
Мадинабону Әділова (Өзбекстан)
Қазылар алқасы бұл кезеңді жобадағы ең қиын сынақтың бірі деп бағалады. Қатысушылар алғаш рет қазақстандық танымал әртістер — 6eluchchi, A.Z., Маржан Арапбаева және Mona Songz-пен дуэт айтып, кәсіби деңгейін жаңа қырынан көрсетті.
Олар ұлттық әндерден бастап авторлық композицияларға дейін орындай отырып, халықаралық сахнаға лайық дайындықтарын дәлелдеді.
Бұрын-соңды болмаған ауқым
Silk Way Star — Орталық Азияда дәл осындай кең географияны қамтыған алғашқы вокалдық жоба. Байқауға 12 мемлекеттің үздік вокалистері қатысып жатыр. Олардың барлығы — халықаралық фестиваль жеңімпаздары, кәсіби әншілер, ұлттық музыкалық мектептердің өкілдері.
Жоба алғаш эпизодтардан-ақ бүкіл аймақты біріктірген кросс-мәдени алаңға айналды. Эфирлердің жиынтық аудиториясы 1 млрд көрерменнен асты, бұл Silk Way Star-ды Орталық Азияның жаңа мәдени брендіне айналдырып отыр.
Silk Way Star эпизодтары алты мемлекеттің телеарналарынан көрсетілуде. Қазақстанда жоба әр сенбі сайын 20:00-де Jibek Joly арнасында эфирге шығады.
Финал: 22 қараша
Ақтық сын 22 қараша күні сағат 20:00-де Jibek Joly телеарнасында тікелей эфирде өтеді. Трансляция Қазақстан, Әзербайжан, Тәжікстан, Қырғызстан және Моңғолияда қатар жүргізіледі.
Жеңімпаз аралас дауыс беру жүйесі арқылы анықталады:
-
50% — қазылар шешімі,
-
50% — онлайн дауыс беру (silkwaystar.org).
Silk Way Star жобасы Қазақстан Республикасы Президенті Телерадиокешені және Қытайдың China Media Group (CMG) арасындағы медиа әріптестік аясында жүзеге асуда.