Сенат Түркістан қаласына ерекше мәртебе беру туралы заң жобасын екі оқылымда мақұлдап, оны Президент Қасым-Жомарт Тоқаевқа қол қоюға жіберді.
Жаңа заңның басты мақсаты – Түркістанның тарихи-мәдени мұрасын тиімді басқару жүйесін құру. Бұл заң аясында Қожа Ахмет Ясауи кесенесі мен оның қорғау аймағындағы археологиялық және ғылыми-реставрациялық жұмыстарды реттеу, тарихи-мәдени ескерткіштердің тұтастығын сақтау көзделген.
Сондай-ақ, қаланың сәулет және құрылыс саясатына ерекше назар аударылады. Сенатор Бауыржан Қаниевтің айтуынша, кесене маңындағы 100 метрлік қорғау аймағында биіктігі 7 метрден асатын нысандарды салуға тыйым салынады, сондай-ақ тарихи кешеннің бейнесіне сәйкес келмейтін құрылыс материалдары мен түстерін пайдалануға шектеу қойылады.
Заң Түркістанның ұлттық қолөнерін дамытуға, тарихи-мәдени мұрасын жандандыруға, сондай-ақ қаланы Қазақстанның рухани және туристік орталығы ретінде дамытуға бағытталған.