Шығыс Қазақстан облысы Ұлан ауданының Алмасай ауылында «Бірқабатты Шығыс» өңірлік бағдарламасы аясында салынған тұрғын үйлер пайдалануға берілді, деп хабарлайды Шығыс Қазақстан облысының әкімдігі баспасөз қызметі. Салтанатты шарада көпбалалы отбасылар мен әлеуметтік осал топ өкілдеріне жаңа пәтерлердің кілттері табысталды. Жергілікті атқарушы органдар өкілдері мен ауыл тұрғындары қатысқан жиында Ұлан ауданының әкімі Арман Бекбосынов қоныс иелерін құттықтады.
Аудан басшысы өз сөзінде Ел Президенті Қасым-Жомарт Тоқаевтың ауылдарды дамыту және халықтың тұрмыс сапасын арттыру жөніндегі тапсырмаларына сәйкес, облыс әкімі Нұрымбет Сақтағановтың қолдауымен кешенді жұмыстар жүргізіліп жатқанын атап өтті. 2024- 2026 жылдар аралығында «Бірқабатты Шығыс» бағдарламасы бойынша оффтейк-келісімшарттар аясында 1 кент пен 10 елді мекенде 210 пәтер салынды.
Бұл бағыттағы жұмыстар кезең-кезеңімен жүзеге асырылуда. 2024 жылы Герасимовка ауылында бой көтерген 88 пәтердің 34-і көпбалалы отбасыларға, 54-і әлеуметтік осал топтарға берілсе, 2025 жылы 24 көпбалалы отбасы мен әлеуметтік санаттағы 36 азамат баспанамен қамтылды. Былтыр жалпы ауданы 4 850 шаршы метрді құрайтын 62 пәтерді пайдалануға беру жоспарланып, оның ішінде 9 ауылда әлеуметтік осал топтарға 28 пәтер, ал 10 ауылда көпбалалы отбасыларға 34 пәтер қарастырылды.
Қазіргі таңда Ұлан ауданында тұрғын үй кезегінде 779 азамат тіркелген. Оның ішінде 167 көпбалалы отбасы, 71 ата-анасының қамқорлығынсыз қалған бала және әлеуметтік осал топтардың 368 өкілі бар.
Алмасай ауылында салынған үйлердің құрылысын мердігер ұйым өкілі Тілек Қоңыровтың айтуынша, бір жылға жуық уақыт ішінде он пәтерлі бес тұрғын үй тұрғызылған. Әр пәтердің аумағы 70-тен 85 шаршы метрге дейінді құрайды және бөлмелер дәстүрлі үш құдықты пештермен, сондай-ақ қажетті инженерлік инфрақұрылыммен (су, электр желілері) толық қамтамасыз етілген.
Жаңа баспанаға ие болғандар қатарында екі жыл бойы кезекте тұрған төрт баланың анасы Гүлнұр Әкімбаева мен 64 жылдық еңбек өтілі бар, «Күміс алқа» иегері әрі Семей ядролық полигонынан зардап шеккен Нұрзипа Сағынбаева бар. Шара соңында қоныс иелеріне баспана кілттерімен бірге тұрмысқа қажетті техникалар мен сый-сыяпаттар табыс етілді.