Шығыс Қазақстан облысында зейнет жасы алдындағы азаматтардың кәсіби әлеуетін ашуға бағытталған «Күміс жас» бағдарламасы өз жемісін беруде. Еңбек жолын жалғастырғысы келетін 50 жастан асқан жұмыссыз тұрғындар бұл бастама арқылы жұмыс тауып жатыр. Қатысу шарты да жеңіл: Enbek.kz, eGov.kz порталдары арқылы тіркелу немесе жергілікті мансап орталығына өтініш тастау жеткілікті, деп хабарлайды Шығыс Қазақстан облысының әкімдігі баспасөз қызметі.
Бағдарламаның басты артықшылығы - мемлекет тарапынан берілетін айтарлықтай қаржылық қолдау. Жұмыс беруші азаматты ресми орналастырғаны үшін үкімет оның айлық жалақысының белгілі бір бөлігін өзі өтейді. Бұл субсидия бірінші жылы жалақының 70 пайызын, екінші жылы 65 пайызын, ал үшінші жылы 60 пайызын құрауы мүмкін. Дегенмен ай сайынғы төлем көлемі 30 айлық есептік көрсеткіштен (АЕК) аспауы тиіс.
Жобаның жалпы ұзақтығы үш жылға дейін созылады. Ең маңыздысы - субсидиялау мерзімі аяқталғаннан кейін де компания немесе мекеме қатысушыны зейнетке шыққанша тұрақты жұмыс орнымен қамтамасыз етуге міндетті.
Жыл басынан бері Шығыс Қазақстан өңірінде «Күміс жас» арқылы 375 адамды еңбекке араластыру көзделген болатын. Қазіргі уақытта оның 363-і тұрақты жұмысқа орналасып, жылдық меже 97 пайызға орындалып үлгерді.
Бұл бастама аға буынның еңбек нарығындағы сұранысын сақтап, табыс табуына жол ашса, жұмыс берушілерге жаңа кадрлар тартып, мемлекеттен қосымша көмек алуға зор мүмкіндік береді.