Қазақстан құрамасы 2026 жылғы қысқы Олимпиада ойындарына 36 спортшымен қатысады. Төрт жылда бір өтетін басты қысқы дода 6–22 ақпан аралығында Италияның Милан және Кортина-д’Ампеццо қалаларында өтеді.
Ресми мәліметке сәйкес, ұлттық құраманы дайындауға жалпы 13,3 млрд теңге жұмсалған. Қаражат республикалық және жергілікті бюджеттерден, сондай-ақ бюджеттен тыс және демеушілік көздерден бөлінген.
Есептеп көрсек, бір спортшының дайындығына шамамен 369,4 млн теңге кеткен. Бұл сомаға оқу-жаттығу жиындары, шетелдік жарыстарға қатысу, құрал-жабдық, медициналық және ғылыми сүйемелдеу шығындары кіреді.
Айта кетейік, 2022 жылы Бейжіңде өткен қысқы Олимпиадада Қазақстан құрамасы бірде-бір медаль жеңіп ала алмаған еді. 2026 жылғы ойындар ел спортшылары үшін нәтижені жақсартуға мүмкіндік болмақ.